Minecraft giellapáhkka
Minecraft davvisámegillii.
Dál lea vejolaš lasihit sámegiela Minecraft Bedrock Editionii ja Minecraft Education Editionii. Jorgalusas leat badjelaš 9000 iešguđege cealkaga ja dávvira jorgaluvvon.
Movt lasihit speallui?
Viečča giellapáhka neahttasiidus deaddileamis “Viečča giellapáhka”
2. Windows dihtoris:
Gávnna fiilla ja deaddil dan guktii dahje deaddil olgeš sáhpánboaluin ja vállje “open”
iPad:
Deaddil “Downloads” boalu badjin olgeš čiegas, ja vállje giellapáhka.
3. Iska ahte laktaseapmi (importeren) álggahuvvui.
4. Raba heivehusaid “Settings” boaluin.
5. Deaddil “Global Resources” ja vállje “My Packs”
6. Deaddil giellapáhka ja vállje “Activate”
7. Mana fas ruovttoluotta váldosiidui vai giellapáhkka válbmanastá.
8. Raba fas heivehusaid ja vállje “Languages” ja dasto deaddilat “Davvisámegiella (Sápmi)”
Dasto lea válmmas!
Dábálaš gažaldagat:
Sáhtán go lasihit sámegiela iežan Minecraftii?
Giellapáhka sáhttá lasihit measta juohke speallanrusttegii mas lea Minecraft Bedrock dahje Minecraft Education Edition. Dábáleamos speallanrusttegat leat Windows dihtorat, iPadat, iPhonat, Andorid dihtordulbbošat dahje telefovnnat, ja Mac. Dađi bahábui ii sáhte lasihit giellapáhka Playstationii, Xboxii dahjege Nintendo Switchii.
Giellapáhkka ii rahpas go vikkan rahpat?
Jus giellapáhkka ii rahpas go vikkat deaddilit, de ii soaitte speallanrusttet fuomášan guđe prográmmain galggašii rahpat fiilla. Windows dihtoriin ferte deaddilit fiilla olgeš dihtorsáhpánboaluin ja válljet “Open with” / “Åpne med” / “Avaa sovelluksessa”. Macas ges válljet “File” ja “Open with”. Jus ii vel doaimma, de fertet iskat lea go Minecraft oba ge speallanrusttegis.
Go laktasa (importere) de čuožžu “Failed to import”?
Mii diehtit ahte gávdno boastuvuohta giellapáhka laktaseamis iPadas ja telefovnnain. Dán leat viggame divvut. Gaskamearalaš čoavddus lea válljet “Open with” / “Åpne med” / “Avaa sovelluksessa” ja lasihit giellapáhka “Notes”-appii. Dasto geahččalat rahpat notes-appa bokte.
Mus lea Minecraft veršuvdna mii lea ođđaseabbot go 1.17.32 dahje 1.18.0?
Giellapáhkka doaibmá buot veršuvnnain mat leat ođđaseabbot go 1.17.32 dahje 1.18.0. Dađi bahábui eai soaitte buot blohkat, dávvirat ja dieđut jorgaluvvon ođđaseabbot veršuvnnain.
Gávdno go Minecraft eará sámegielaide?
Minecraft ii leat vuos jorgaluvvon eará sámegielaide, muhto mii leat iskame vejolašvuođaid.
Manne ii leat Minecraft “gávpi” jorgaluvvon?
Minecraft ii leat addán reaidduid jorgalit gávppi. Mii leat gulahallame Microsoftain movt mii čoavdit dán hástalusa.
Mus ii rahpas iPad:as?
1. Viečča fiilla rukses boalus dás bajábealde. Dat galgá gohčoduvvot “namma”.mcpack. Fiila manná de “Fiillat/Files” áppa sisa.
2. Mana Fiilllat/Files (alit gihppu) áppii -> Vieččamušat/Downloads ja deatte fiilla dassái go ihtet válljejumit. Dál válljet Sirdde/Move.
3. Njávkkas vulos gihppagii mas namma lea Minecraft dahje Education ja coahkkal dasa.
4. Vállje “Máŋge/copy” bajit olgeš čiegas. 5. Deaddil dasto “gaskkalduhtte/cancel” ja vállje baicce iPad:as/On iPad. 6. Vállje Minecraft dahje Education gihppaga ja ja deaddil giellapáhka. Dás oainnát video proseassas (eŋgelasgillii).